কবিতা

আইসো বাহে বশ্শি নিয়া – রফিক মোহাম্মদ

রংপুরের আঞ্চলিক ভাষায় লেখা

আইসো বাহে বশ্শি নিয়া

রফিক মোহাম্মদ

 

অঙের মানুষ অংপুরিয়া
তোমরাগুল্যা কোটে?
বশ্শি দিয়া নোক নোকেয়া
মাছ তোলো এক খোঁটে।

নেওয়া বানান পিঁকড়া দিয়া
উটির সাতে ডলি,
কোদাল দিয়া উটকি আনেন
মাটিয়া চ্যারা কলি।

খোলা ডিগি ভত্তি মাছে
সর বান্ধিয়া ঘোরে,
মানুষ দেকি মজাক করি
ঝাঁপে জোরে জোরে।

চিলকি উঠি মুক ভাসে দেয়
উদ্যাম ডিগি পায়া,
কুচরি পানার আদার গেলে
খালি দ্যাকোং চায়া!

আইসো বাহে অমুক তমুক
টপাস করি এ্যলা,
খইরোত দিছি ডিগি হামার
বসে দিছি মেলা।

বদনা না হয় খলাই আনেন
মাছ থুইমেন জিয়া,
ডিগিত কিন্তুক নাল ফাটা অইদ
ছাতি আইসেন নিয়া।

Related Articles

Leave a Reply

Close